Alla Itolae Nusa 31

Yakupe ilene Labane eni nanaru esi beteke be, “Yakupe irana iteki ama eni taneiaru pusulu peneka. Yakupe eni taneia bokala meru bei iteki ama eni taneiaru.”

Kai Yakupe iselu be Labane iono mise lokoi saka akmenare moneka.

Eleki TUHANE Ibeteke loko Yakupe be, “Aleu loko amamu eni kotare kai loko amu lumatoinu. Au raka ale.”

Eleki Yakupe iulake koti Rahela kai Lea leke keu lokoi me neu, me otoi maka ala eni pipiaru kai dombaru.

Eleki Yakupe ibeteke loko luasi be, “Au selu be imi ama iono mise lokoku saka akmenare moneka, po amaku eni Allare Irakaku.

Luami rekwa lekwe be au kerike ktili titinai ete amami peneka.

Masike ele mere po amami lemake, le ilelike laleije rebai butu esa le taneia rebe suke rilukelu ete aure. Po Alla Isebeie iono tiae ete au mo.

Kena amami beteke be pipi rebe maklikataru uleue au, hoko pipiaru pusulu ruele anai maklikate. Kai ibeteke be, pipi rebe lakuaru uleue au hoko pipiaru pusulu ruele anai lakue.

Hoko Alla Irana amami eni binatanaru eleki Irilukelu ete aure ele mere.

Rebai sae kena pipia kai dombaru esi tale maka asare, au kmani be au selu pipi tulena maklakue, oto putile kai metene toha lomai kai maklikate uasa pipi inaiju.

Eleki au selu Alla saka malekate Ibeteke loko au be, ‘Yakupe!’ Eleki au ralake be, ‘Mula, Tuhane!’

Eleki Iombe, ‘Aselu, pipi tulena rebe uasa pipi inaiju mere maklakue, oto putile kai metene toha lomai kai maklikate, le Au rekwa pusue yelu rebe Labane ionoe ete ale peneka.

Au meije Alla rebe au aselukeKu ete ale mpai Betele. Ete mere aeleke batu kena lisi rebe asoba kena lei saitune kai ete mere ala eteKue. Hoko kena meije aakneka kena asiri bei kota meije kai leu loko ale kai amu luma toine imi kotare.’”

Eleki Lea kai Rahela luasi beteke be, “Amiki ama iriluke sasaisa bei eni taneiaru ete ami moneka.

Iono ami lupe tamata makete le iabelie ami, kai ami belimaru ikane pusulu peneka.

Po pusue amiki ama eni taneia rebe Alla Iono eleu ale, mere ete ami kai amiki nanaru. Hoko kena meije saisa rebe Alla Ibetekele ete ale, aono lulu neka.”

Eleki Yakupe iakneka kena ileu loko amai lopai tape Kanane. Isake eni nanaru kai eni binaru kena unta. Kai ikeri pusue eni pipiaru, dombaru kai pusue taneia rebe isupulu me otoi Padane-Arame.

[tolong lihat ayat sebelumnya]

Kena mere Labane ikeu ktoli domba bului me neu. Kai kena mere lekwe Rahela indeae tanei rebe esi hlaleke be eono hlamate ete lumatoine.

Yakupe ikeu akbunike bei Labane, tamata Arame mere. Ibeteke etei moneka.

Irana pusue eni taneiaru eleki esi keu akmete. Esi sabu kwele Eprate eleki esi keue ulata rebe esi nane Gileate.

Eleki ele petu telure esi beteke ete Labane be Yakupe inaya peneka.

Labane ilupuke eni tamataru eleki esi sui lulu Yakupe, petua itu eleki esi lau bei Yakupesi moneka me ulete Gileate.

Eleki kena esi ntulu, Labane ikmani be Alla Iluake lokoi kai Ibeteke be, “Anete mimise! Alepa lepate tiae matai esa loko Yakupe yake.”

Kena mere Yakupe esi ono tenda kena ulate sae me, yo Labane kai eni tamataru esi ono tenda kena ulate sae leneka kena otoi mere.

Labane ibeteke loko Yakupe be, “Lemula pine alemake aure, kai anaya le auku anaru lupe tamata rebe esi supu kerike kena lisare?

Alemake au kai imi keure abeteke ete au moneka. Sepo akotie bei au hoko au suka le imi keu kena misete. Kena imi keure ami menani kai laka tibale kai klemake kecapi.

Asebeie au ata auku anaru kai upukusi kena esi keure mone pe! Aono ele mere boro titinai.

Au kbasa kena ono susate etemu, po mempetuke Alla rebe amamu ihlaleke lokoIje, Ibeteke eteku leke au lepae lepate tiae matai esa ete ale yake.

Au rekwa be akeu meije le lalemu titinai kena leu peneka. Po mula pine andeae tanei rebe ami hlaleke be eono hlamate ete lumatoine?”

Yakupe iralake be, “Au keu akbunike le rilaku betinake memeta asuka le amu anaru esi keu mo.

Eleyo memeta amu tanei rebe imi hlaleke be eono hlamate ete imire pine memeta atetuele kena tamata sire ete meije, isupu hukume eti mata. Memeta anikwa amu tenei mere mei auku taneiaru, sepo tetuele hoko rana neka. Kai iteki tamataru esi sasikele.” Yakupe irekwa mo be Rahele iranae.

Eleki Labane ikusu nikwa me Yakupe eni tenda, eleki ikusu Lea eni tenda, eleki ikusu me bina makerike luaru esi tenda, po tanei mere itetuele mo. Eleki ikusu nikwa me Rahela eni tenda.

Kena mere Rahele irana tanei mere eleki ikutele kena makasusi untare esi muline mpai lale eleki irue sepele me ntendare esi laleije. Hoko Labane inikwa pusue Rahela eni tendare esi laleije po itetue tanei mere mo.

Rahela ibeteke loko amai be, “Ama aono au yake le au supu bulane hoko au keleke loko ama ale mo.” Labane inikwa pusue tenda laleije mimise po itetue tanei mere mo.

Hoko Yakupe inasu. Ibeteke loko Labane be, “Au ono sala ete ale mo yo aono neune, asui lulu au le mula?

Memete anikwa pusue auku taneiaru peneka. Memeta atetue sae hoko tolaele ete meije leke amu tamataru kai auku tamataru esi selu kai esi rekwa be sire pine inkena.

Musuna butu lua au rue kai memete ale peneka. Kena au raka memeta amu domba kai pipiaru, domba kai pipi inaiju esi tukune tetu mo kai au kane memeta amu domba kai pipi tulenaru au kane inai sae mosa.

Domba kai pipi rebe binatane maka kane binatane ketelu au leukelu ete meme ale mo po au selie. Rebe esi ndealu kena kpita pise kpetu memeta atutuke au kena au selie.

Kena kpita kabalane eana au, kena kpetu au ndiri kai lakwai sesi au supu ntulu mo.

Au supue meru kena au kerike etemu musuna butu luaru. Musuna butu esa lesini ata au kerike ete memeta ale kena au supu kai kai memeta amu anaru. Musuna ne au kerike kena au supu pipi kai dombaru. Kai salauke mere rebai butu esa alelike lalemu bei saisa rebe asuka rilukele ete aure.

Sepo upuku esi Alla, rebe upuku Abrahame kai amaku Isake esi tatu lokoIje Iraka au mo, hoko tinai neka memeta aulake au leure keri sasaisa moneka. Po auku susate kai makerike rebe au kerikele Alla Ilene lokoe hoko mempetuke Ilake memete ale.”

Eleki Labane iombe, “Kwete bina lua meru auku anae kai luasi nanaru meru esi leu au kai pipi kai domba meru aukue lekwe. Kai pusue taneia rebe selulu ete meije akue. Po au ono sasaisa moneka kena au tahane auku anaru kai upukusi.

Ele mere hoko ite taluke misete kai lomai kai ite lupuke batu kena lisi ete ite be ite taluke misete kai lomai.”

Eleki Yakupe irana batu inai sae me kena ielekele kena eono lisi.

Eleki Yakupe ibeteke loko eni tamataru esi lupuke batu eleki esi lupukele bubui. Eleki esi kane sakesa tehaike batu bubui mere.

Labane iono batu bubui mere esi nane Yegare-Sahaduta, po Yakupe iono esi nane Galete.

Labane ibeteke loko Yakupe be, “Batu bubui meije eono lisi ete ite lua.” Elemere eti batu toini mere esi nane Galete.

Kai Labane ibeteke be, “Masike luai rue lau bei lomaije po TUHANE Iraka ite lua leke lisa kai lomai yake.” Hoko otoi mere esi ono esi nane Mispa lekwe.

Labane ibeteke lekwe be, “Sepo aono tiae ete auku anaru pise akai bina makete, masike sae irekwa mo po Alla Irekwa ale kai Ihukume ale.

Meije batu bubui rebe au lupekelu kai batu elake rebe elekele kena eono lisi ete ite,

Batu bubui meije kai batu elake meije eono tanda ete ite lua be au lia batua meiju loko memete ale mo kai memeta ale lekwe alia loko au mo sepo luake kena lale tiae.

Alla rebe Abrahame kai amaku Nahore luasi hlaleke lokoIje Ihukume ite lua sepo luai lulu saisa rebe luai talukele meije mo.” Eleki Yakupe ila loko Alla rebe amai Isake itatu lokoIje, kena inete loko luasi taluke misete kai lomai mere.

Eleki Yakupe ipala binatane kena rilukele ete Alla kena ulate mere. Eleki ikoti tamata ete meru kena esi kane sakesa. Kane pela eleki esi ntulu ete mere.

Ele bobanu bebeleite Labane iata upuisi kai eni nanaru kai ikotie loko Alla leke Iriluke misete etesi, eleki ileu lori Padan-Arame me eni luma ne.